ಗರ್ಭದಾಚೆಯ ಅನಾಥ.

-


ನನ್ನನ್ನೇಕೆ ನಿನ್ನೊಡಲಾಳದಿಂದ ಹೊರದಬ್ಬಿದೆ ಅಮ್ಮ

ನಿನ್ನೊಳಗೇ ಅವಿತಿಟ್ಟುಕೊ ನನ್ನ, ಬಿಸಿ ಅಪ್ಪುಗೆಯಲ್ಲಿ.


ಪ್ರತಿ ಕ್ಷಣವೂ ನಿನ್ನೊಟ್ಟಿಗಿದ್ದ ನಾನು ನಿಧಾನವಾಗಿ ಎರಡು ದೇಹಗಳಾಗಿ

ಎರಡು ಮನಸ್ಸು, ಬುದ್ಧಿಗಳಾಗಿ, ಎರಡು ವಿಚಾರವಾಗಿ ಅನುಭವಿಸುತ್ತಿರುವ ಈ ಪರಿತಾಪನೆ ನನ್ನಿಂದಾಗದು.

ನಾನು ನಿನ್ನನ್ನೇ ಮಾತಾಡಬಯಸುತ್ತೇನೆ, ಕೇವಲ ನಿನ್ನನ್ನೇ ಕೇಳಬಯಸುತ್ತೇನೆ, ನಿನ್ನನ್ನೇ ನೋಡಬಯಸುತ್ತೇನೆ,

ನಿನ್ನದೇ ವಿಚಾರಗಳನ್ನೇ ಚಿಂತಿಸಬಯಸುತ್ತೇನೆ.

ಬೇರಾವ ಚಿಂತನ ಮಂಥನಗಳ ಹೊರೆ ನನಗಿಲ್ಲದಂತೆ

ಮತ್ತೊಮ್ಮೆ ಕರೆದುಕೊ ನನ್ನನ್ನು ನಿನ್ನೊಡಲಾಳಕ್ಕೆ.


ನನಗೆ ನೀನು ಕಗ್ಗತ್ತಲೆಯ ಅನುಭವ ಕೊಟ್ಟೆಯಾದರೂ

ಈ ಭುವಿಯ ಕಗ್ಗತ್ತಲೆಯ ಭೀಭತ್ಸತೆ ನನ್ನಿಂದ ತಡೆಯಲಾಗದು.

ನಿನ್ನ ಗರ್ಭದಲ್ಲಿ ನಾನದೆಷ್ಟೋ ಬಾರಿ ಕಣ್ಣೀರು ಸುರಿಸಿದರೂ ಈ ಭುವಿಯ ಕಣ್ಣೀರುಗಳ ಯಾತನೆ ತಡೆಯಲಾಗದು.

ನಿನ್ನೊಡಲಾಚೆಗೀಗ ನಾನು ಅನಾಥ, ಅನರ್ಥ, ಅನವಶ್ಯಕ.

ನಿನ್ನೊಡಲ ದೇಗುಲದ ಆಸರೆಯೇ ನನಗೆ ಮುಕ್ತಿ.

ಅಪ್ಪಿಕೋ ಒಡಲಾಳದೊಳಗೆ ಮತ್ತೊಮ್ಮೆ ಪೂರ್ಣ ಶೂನ್ಯದಂತೆ.


ಮತ್ತೊಂದು ಇನ್ನೊಂದು ಬೇಕೆಂಬ ತೊಳಲಾಟ ಮಾಡೇನು,

ನೀನುಂಡದ್ದೇ ನಾನುಣ್ಣುವೆ, ಕುಡಿಯುವೆ ಮತ್ತೇನೂ ಕೇಳದೆ.

ನಿನ್ನ ಗರ್ಭದಾಚೆ ನಾ ಈ ಭುವಿಗೆ ಭಾರವೆಂಬ ಭ್ರಾಂತಿಗೆ

ಬೇಕೊಂದು ನಿನ್ನೊಡಲಾಳದಲ್ಲಿ ಹೋರಾಟವಿಲ್ಲದ ವಿಶ್ರಾಂತಿ.

ಬೇಕೊಂದು ಶ್ರಮಿಸದ, ಸೊರಗದ, ದಣಿಯದ ಚಿತ್ತಶಾಂತಿ.

ಬದುಕುವೆ ಸದಾ ನಿನ್ನೊಡಲಾಳದಲ್ಲೇ ಮತ್ತಾವ ತೊಡಕು ತಕರಾರುಗಳಿಲ್ಲದೆ.

ಬಚ್ಚಿಟ್ಟುಕೊ ಸ್ವರ್ಗದಂತಿರುವ ನಿನ್ನ ಗರ್ಭದಲ್ಲಿ

ಲೌಕಿಕದ ಇನ್ನಾವ ವಕ್ರ ದೃಷ್ಟಿಯೂ ಬೀಳದಂತೆ.

                                 ..........ಬಸವ.

Comments

Post a Comment

Thank you

Popular posts from this blog

ಬಾಬಾ ಶಿವಾನಂದ - ಒಂದು ವ್ಯಕ್ತಿ ಪರಿಚಯ.

-
ತುಂಬಾ ದಿನಗಳಿಂದ ತಿರುವಣ್ಣಮಲೈನ ಅರುಣಾಚಲೇಶ್ವರ ದೇವಸ್ಥಾನಕ್ಕೆ ಭೇಟಿ ಕೊಡುವ ವಿಚಾರವಿತ್ತು. ಈ ಬಾರಿಯ ವಾರಾಂತ್ಯದ ಒಂದು ದಿನ ಅದಕ್ಕಂತಲೇ ಮೀಸಲಿಟ್ಟು ಬೆಳಿಗಿನ ಜಾವ 5.30 ಗೆ ಹೊರಟವರು 200ಕಿಮೀ ಕ್ರಮಿಸಿ ಕೆಲ ತಾಸಿನಲ್ಲಿಯೇ ಸುಂದರ ದೇವಸ್ಥಾನದ ಗೋಪುರಗಳ ಮುಂದೆಯೇ ನಿಂತಿದ್ವಿ. ನಾನು ಮತ್ತೆ ನನ್ನ ಸಹದ್ಯೋಗಿ, ಸ್ನೇಹಿತ ಸುವೆಂದು.  ಅರುಣಾಚಲೇಶ್ವರ ಪಂಚಭೂತ ಲಿಂಗಗಳಲ್ಲಿ ಅಗ್ನಿಯನ್ನ ಪ್ರತಿನಿಧಿಸುತ್ತಾನೆ. ದೇವಸ್ಥಾನದೊಳಗೆ ಶಿವ ತನ್ನ ಮಡದಿ ಪಾರ್ವತಿಯೊಂದಿಗೆ ಭವ್ಯ ಮತ್ತು ಸುಂದರ ಕಟ್ಟಡದೊಳಗೆ ಒಂದೊಂದು ಪ್ರತ್ಯೇಕ ಗರ್ಭಗೃಹಗಳಲ್ಲಿ ನೆಲೆಯುರಿದ್ದಾರೆ. ಭಾರತದಲ್ಲಿಯೇ ಅತ್ಯಂತ ದೊಡ್ಡ ದೇವಸ್ಥಾನ ಪ್ರಾಂಗಣ ಹೊಂದಿರುವ ದೇವಸ್ಥಾನ ಇದು. ಅರುಣಾಚಲ ಬೆಟ್ಟದಡಿಯಲ್ಲಿ ಗಗನಚುಂಬಿ ಗೋಪುರಗಳ ಮಧ್ಯಗಿನ ಸುಂದರ ದೇವಸ್ಥಾನದಲ್ಲಿ ಅಂಗಾಲುಗಳು ನೆಲಕ್ಕೆ ಸ್ಪರ್ಶಿ ಅಲ್ಲಿ ತಿರುಗಾಡುತ್ತಾ ಪಡೆದುಕೊಳ್ಳುವ ದಿವ್ಯ ಅನುಭೂತಿಯೇ ವಿಶೇಷ ನೆಮ್ಮದಿ. ದೇವರ ದರ್ಶನ ಮುಗಿಸಿಕೊಂಡು ಅಲ್ಲೇ ದೇವಸ್ಥಾನದ ಪ್ರಾಂಗಣದಲ್ಲಿ ತಿರುಗಾಡುತ್ತಿದ್ದಾಗ ಸುಮಾರು 65ರ ಮೇಲಿನ ವಯಸ್ಕರೊರ್ವ ಬಿಳಿಯ ಪಂಚೆ, ಕಾವಿ ಜುಬ್ಬಾ, ಉದ್ದನೆಯ ಬಿಳಿಕೂದಲಿಗೆ ಜುಟ್ಟೊಂದು ಹಾಕಿಕೊಂಡಿದ್ದ. ಕೊರಳಲ್ಲಿ ಒಂದೆರಡು ರುದ್ರಾಕ್ಷಿಗಳು, ಹೆಗಲಮೇಲೊಂದು ಕಾವಿ ಶಾಲು, ಹುಬ್ಬುಗಳ ಮಧ್ಯೆ ಕುಂಕುಮ, ಸ್ವಲ್ಪ ಉದ್ದನೆಯ ಬಿಳಿ ಗಡ್ಡ ಮತ್ತು ಬೆಳ್ಳನೆಯ ತೇಜಸ್ಸು ಭರಿತ ಮುಖ. ಈ ಕಾಯ ಅಲ್ಲಿ ಕಂಡದ್ದೇ ತಡ...
Read more

ನೆನಪುಗಳದ್ದು ಸ್ವೇಚ್ಛಾಚಾರ.

-
ನೆನಪುಗಳೇಕೆ ಹೀಗೆ? ಬೇಕೆಂದರೂ ಬಾರದೆ ಬೇಡವೆಂದರೂ ಬಂದು ಪೀಡಿಸುತ ಅದೆಷ್ಟೋ ಬಾರಿ ಪ್ರಶ್ನಿಸಿದರೂ ಉತ್ತರ ಕೊಡದೆ  ತಮ್ಮದೇ ಹಳೆ ಚಾಳಿ ಮುಂದುವರೆಸುವವು. ಹಗಲಿಗೋ ಇರುಳ ಚೆಲ್ಲಿ ಇರುಳಲ್ಲಿ ಹಗಲ ತೇಲಿಸಿ ತೆಂವಿಸಿಹವು ಕಣ್ಣುಗಳ, ತಳಮಳಸಿ ಮನಸ್ಸು. ಮರೆತೆನೆಂದಾಗಲೇ ಅಸ್ತಿತ್ವದ ಮೆರವಣಿಗೆಯ ಹೂಡುವವು ತಾವುಗಳೇ ಇಲ್ಲಿ ರಾಯಭಾರಿಯೆಂದು ಬೀಗುವವು. ನೆನಪುಗಳವು ಸಹಜ ಅಸಹಜಗಳ ಚರ್ಚಿಸುವವು ನಟಿಸುವವು ತಮಗೇ ಬೇಕಾದ ರಂಗಮಂಟಪ ನಿರ್ಮಿಸಿ ನಾನೊಲ್ಲದ ಕೇಳದೆ, ತಾನೊಲಿದುದೇ ತೆರೆಗೆ ಎನ್ನುವವು ತಾವಾಗುವವು ತಮಗೇ ಬೇಕಾದ ತೆರತೆರನಾಗಿ ಆವರಿಸುವವು ಹಗಲಿರುಳ ಕನಸಿಗೆ ತಾವೇ ಅಧಿಪತಿಯೆಂದು. ನೆನಪುಗಳದ್ದು ಎಂತಹ ಸ್ವೇಚ್ಛಾಚಾರ? ಹಿತವನ್ನೇ ಆಲಿಂಗಿಸುವೆನೆಂಬುದಕೆ ಹಿಯಾಳಿಸಿ ಹ್ಯೆಯವಾಗಿ ಹೆಣಗುವಾಗ ಒಂದೊಮ್ಮೆ ಹಾಯೆನಿಸಿಹೋಗುವವು ಕ್ಷಣಕ್ಕಾದರೂ ತಾವು ಹೀಗೂ ಎಂಬುದ ತೋರಲು ತಿಳಿಯಾಗಿ ಹಿತ ತೇಲಿಸುವವು ನೆನಪುಗಳವು ಬಿಗುತ್ತಿರುವವು ಸ್ವೇಚ್ಛಾಚಾರದ ಪರಮಾವಧಿಯಲ್ಲಿ.                                                .......ಬಸವ.
Read more

ಮನಸ್ಸು ಮೌನಕ್ಕೆ ಶರಣಾಗಿದೆ.

-
ಮನಸ್ಸು ಮೌನಕ್ಕೆ ಶರಣಾಗಿದೆ ತಿಳಿಯಾಗದೆ ಉಳಿದ ಮನದ ಕೆಲವು ಜಟಿಲಗಳು ಜೋರಾದಾಗ, ಎಂದಿಗೂ ಉತ್ತರ ಸಿಗದ ಒಲವ ಪ್ರಶ್ನೆಗಳು ಮತ್ತೆ ಮತ್ತೆ ಹಾಜರಿಯನ್ನಿಟ್ಟಾಗ, ಶಾಶ್ವತ ಸಾಂಗತ್ಯದ ಶಪತವನಿಟ್ಟ ಒಲವೊಂದು ಸೂಚನೆಯೂ ಇಲ್ಲದೆ ಕಣ್ಮರೆಯಾಗುತ್ತಿರುವಾಗ ಮನಸ್ಸು ಮತ್ತೆ ಮೌನಕ್ಕೆ ಶರಣಾಗಿದೆ. ಮನಸ್ಸು ಮೌನಕ್ಕೆ ಶರಣಾಗಿದೆ ಹೃದಯದ ಕಂಪನಗಳನ್ನ ಆಲಿಸಬೇಕಿದ್ದ ಒಲವೇ ಬದಿರವಾದಾಗ, ಮಾಗದಂತೆ ಎದೆಯ ಗೋಡೆಯಲ್ಲಿ ಪ್ರೇಮಾಂಕುರವನಿಟ್ಟ ಲೇಖನಿಯ ಶಾಹಿಯೇ ಖಾಲಿಯಾದಾಗ, ಹೃದಯದ ಬಡಿತಕ್ಕೂ ಪರವಾನಗಿ ಕೇಳುತ್ತಿದ್ದ ಕಣ್ಣುಗಳು ದೃಷ್ಟಿಯನ್ನೇ ಬದಲಾಯಿಸಿದಾಗ ಮನಸ್ಸು ಮತ್ತೆ ಮೌನಕ್ಕೆ ಶರಣಾಗಿದೆ. ಮನಸ್ಸು ಮೌನಕ್ಕೆ ಶರಣಾಗಿದೆ ಸದಾ ಮುದವನಿಕ್ಕುವ ಹೃದಯದ ಆಲಿಂಗನವೊಮ್ಮೆ ಕೇವಲ ಯಾಂತ್ರಿಕ ಸ್ಪರ್ಶವಾದಾಗ, ಎಂದೋ ಹದವಾಗಿ ಬೆಸೆದ ಭಾವಗಳು ಬೇಸರಗೊಂಡು ಭಾವೋದ್ವೇಗ ತಾಳಿದಾಗ, ಒಲವೊಂದು ತನ್ನ ಅಂತಿಮವಿದಾಯದ ಮುನ್ನ ನಗುಮೊಗದ ಕಣ್ಣೀರನಿಟ್ಟಾಗ ಮನಸ್ಸು ಮತ್ತೆ ಮೌನಕ್ಕೆ ಶರಣಾಗಿದೆ.                                      ...........ಬಸವ.
Read more