ಇಂದು ನಾ ಗಂಡಸು ವರವೋ ಶಾಪವೋ?

ವಿಧಿ ವಿಧಿಸಿದ ಶಾಪವೋ ವರವೋ, ನಾ ಇಂದು ಗಂಡಸು

ಎಲ್ಲವೂ ನನ್ನಿಂದಲೇ ಆಗಬೇಕೆಂಬ ಬದುಕಿನ ಅಲಿಖಿತ ಜೀತ.

ಹೊರೆಯಾದ ಹೆಗಲ ಮೇಲೂ ಹೊರೆ ಹೊರುವ ಹೊರೆಗೆ ಜವಾಬ್ದಾರಿಯ ಹೆಸರಿಟ್ಟ ಸಮಾಜದಲ್ಲಿ,

ಈ ಜವಾಬ್ದಾರಿಗೆ ನಾ ಗಂಡಸು ವರವೋ ಶಾಪವೋ?

ಅಳಲು ನನ್ನಲ್ಲಿಯೂ ಕಣ್ಣೀರಿದ್ದರೂ,

ಭಾವಜೀವಿಯಾಗಲು ನನ್ನಲ್ಲೂ ಭಾವನೆಗಳಿದ್ದರೂ,

ದಣಿದ ದೇಹಕ್ಕೆ ವಿಶ್ರಾಂತಿಯ ಹಂಬಲವಿದ್ದರೂ,

ನಾ ಇಂದು ಗಂಡಸಾಗಿ ತ್ಯಾಗಗೈಯ್ಯಲೇಬೇಕಿದೆ.

ಈ ತ್ಯಾಗಕ್ಕೆ ನಾ ಗಂಡಸು ವರವೋ ಶಾಪವೋ?

ಇಂದು ನಾ ಏನನ್ನೂ ಅರಿಯದಿದ್ದರೂ,

ಎಲ್ಲವನ್ನೂ ನಾ ಕೇಳಿ, ಸುಧಾರಿಸಿ, ಸಾಗಿಸಬೇಕು.

ಬದುಕಿನ ಬಂಡಿಗೆ ನೀನೊಬ್ಬನೇ ಎತ್ತು ಎಂಬ ನಿಯಮಾವಳಿ.

ನಾ ಬೆವತು ಬಸವಳಿದರೂ, ಬದುಕಿನ ಸಾಗಾಟಕ್ಕೆ ಮತ್ತೆದ್ದು ನಿಲ್ಲಬೇಕು.

ಈ ಬೇಗೆಗಳಿಗೆ ನಾ ಗಂಡಸು ವರವೋ ಶಾಪವೋ?

                                            .......ಬಸವ.