Posts

Showing posts from March, 2025

ಸೂರಿನಾಚೆಗೊಂದು ಸೂರು.

ಇಲ್ಲಿಯೇ ಹೀಗೆಯೇ ಹುಟ್ಟಲು  ಅಂದು ಗಸ್ತು ಹಿಡಿದು ಕೂತದ್ದು ಇಂದು ಮರೆತೆವು. ಮರೆತೆವು, ಎಂದಿಗೂ ಮತ್ತೆ ಏನನ್ನೂ ಮರುಕಳಿಸದಂತ್ತೆ ಅವನಲ್ಲಿ ತಟಸ್ತವಾಗುವುದ ಮರೆತೆವು. ಬದುಕಿಗೊಂದೇ ಏಕಮಾತ್ರ ಬಿಂದು ಇರುವುದ ಅರಿತಿದ್ದರೂ ಇಲ್ಲಿ ಮುಕ್ತಿಯೊಂದರ ಬಿಂದು ಬಿಟ್ಟು ಇನ್ನೆಲ್ಲವೂ ಕೂಡಿಸಲು ಹೊರೆಟವಲ್ಲ. ಎಲ್ಲವನ್ನ ತ್ಯಜಿಸಿ,ತಾಳಿ,ತಪಸ್ಸುಗೈದರೂ ಸಿಗದ ತತ್ವವನ್ನ ಲೋಭಗಳಲ್ಲಿ ತಪಿಸಿ ತಪಿಸಿ ಕಳೆದುಕೊಳ್ಳುತ್ತಿರುವೆವಲ್ಲ. ಸದಾ ರಂಜನೆಗಳಲ್ಲಿ ರಂಜಿಸುತ ನಿರಂಜನನಾಗಬೇಕೆಂದೇವಲ್ಲ. ಅಧ್ಯಾತ್ಮದಾಳಕ್ಕೆ ಮುಳುಗಿ ಪಡೆವ ಮುತ್ತೊಂದನ್ನ ಬರಿಗಣ್ಣಿಂದ ಮೇಲೆಯೇ ಹುಡುಕ ಹೊರಟೆವಲ್ಲ. ಸಿಗದಲ್ಲಿಗೆ, ಸೋತ ಭಾವವೂ ಇಲ್ಲದೆ ಮತ್ತೇ ಹೀಗೆಯೇ ಹುಟ್ಟಲು ಹುಲ್ಲುಕಡ್ಡಿಯಾಗಿಯೋ, ಅದರಡಿಯ ಇರುವೆಯಾಗಿಯೋ ಅಳತೊಡಗಿದೆವಲ್ಲ. ಮರೆತೆವಲ್ಲ ಮೋಕ್ಷವನ್ನ ಮಾಯೆಗಳಡಿಯಲ್ಲಿ. ನೆನಪಿಗೂ ಬಾರದ ಸುಕರ್ಮಗಳಿಂದ ಕೂಡಿಟ್ಟ ಕೂಳನ್ನ ಇಂದು ಬೇಡದ ಪಾಪವೆಂಬ ಮಾಂಸ ಮಜ್ಜನಗಳಲ್ಲಿ ಮುಳಿಗಿಸಿ ಮೋಕ್ಷಕ್ಕೆ ಮೈಲಿಗೆಯಾಯಿತೆಂದವಲ್ಲ. ಸೂರಿನಾಚೆಗೊಂದು ಸೂರಿರುವದ ಅರಿತರೂ  ಮತ್ತೆ ಮತ್ತೆ ಇದೇ ಸೂರಿನೊಳಗೇ ಸಿಲುಕಿ ಸೋತೆವಲ್ಲ.                                             ...........ಬಸವ.

ಒಲವ ಬೀದಿಗಳು.

ಗುರುತಿಲ್ಲದೆ ಇದ್ದ ಬೀದಿಗಳೇ ಅದೆಷ್ಟೋ ನೆಮ್ಮದಿಗಳ ಹಾಸುತಿದ್ದವಲ್ಲ, ಇಂದು ಅದೇ ಬೀದಿಗಳು ಪರಿಚಯವಾದ ಮೇಲೆ ಅಸಂಬಂಧಿತ ಎಂಬಂತ್ತೆ ದೂರಿತ್ತಿವೆ, ಮರುಗನ್ನಡಿಯನ್ನ ತೋರಿಸುತ್ತಿವೆ ಅಂದಿಗೂ ಇಂದಿಗೂ ಕಂಡ ಬಿಂಬಗಳ ಸೂತ್ರ ಬಿಡಿಸಿ, ಅದೇ ಬೀದಿಯ ಎರಡೂ ದಂಡೆಯ ಮೇಲೆ ನಿಂತ ಒಲವುಗಳ ಪ್ರಶ್ನೆಗಳಿಗೆ ಉತ್ತರ ಮಾತ್ರ ನಿರುತ್ತರ. ಒಟ್ಟಿಗೆ ಅದೆಷ್ಟೋ ಸಾವಿರ ಹೆಜ್ಜೆಗಳ ತುಳಿದರೂ ಅಗದಿದ್ದ ಆಯಾಸ ಇಂದೊಂದೇರೇಡ್ಹೆಜ್ಜೆಗೆ ದಣಿವಾವರಿಸಿದೆ, ಒಲವಿನೆದುರು ಎತ್ತಲೂ ಹೊರಳಿದಿದ್ದ ಕಣ್ಣೋಟಗಳು ಇಂದು ಕ್ಷಣಕ್ಕೂ ದೃಷ್ಟಿ ಬೆರೆಸುತ್ತಿಲ್ಲ, ಸದಾ ಉತ್ಸಾಹಗಳಿಂದ ಸ್ವಾಗತಿಸುತಿದ್ದ ಬೀದಿಗಳ ತಿರುವುಗಳು ಮೆಲ್ಲಗೆ ನಿರಾಸಕ್ತಿಯನ್ನ ಹೊರಚೆಲ್ಲುತ್ತಿವೆ, ಒಮ್ಮೆ ಆ ಬೀದಿಗಳ ಕಾಣಲು ಹಾತೊರೆಯುತ್ತಿದ್ದ ಹೃದಯ ಇಂದು ತಲ್ಲಣಿಸುತ್ತಿದೆ ಕಂಡು ನೋವೆಂಬ ಭಿತ್ತಿಚಿತ್ರಗಳ. ಕೋನೆಯದೊಂದು ಹೆಜ್ಜೆ ಕೂಡಿಡುವ ಸಮಯ ಈ ಬೀದಿಗಳಲ್ಲಿ ಇನ್ನೆಂದೂ ತುಳಿಯೇನೆಂಬ ಸತ್ಯಕ್ಕೆ ಹ್ಞೂಗೊಟ್ಟು, ಹೋಗುತ್ತ ಮೂಡಿಸಿದ್ದ ಅದ್ರ್ಯಶ್ಯ ಹೆಜ್ಜೆಗಳನ್ನ ಅಳಿಸುತ್ತ ಬರಬೇಕಿದೆ ಒಂದೊಮ್ಮೆ ಮತ್ತದೇ ಬೀದಿಗಳಲ್ಲಿ, ರುಜುಹಾಕಬೇಕಿದೆ ಆ ಬೀದಿಗಳಲ್ಲಿ ಮೂಡಿದ ಅಳು ನಗುಗಳು ತಾತ್ಕಾಲೀಕವೆಂಬ ಸ್ಪಷ್ಟಿಕರಣದ ಕಡತಕ್ಕೆ, ದುಃಖಿಸುವ ಉಸಿರಲ್ಲೂ ಒಂದೊಮ್ಮೆ ಬಿಡುವಿಟ್ಟುಕೊಂಡು ಕೊಡಬೇಕಿದೆ ನಿಟ್ಟುಸಿರ ಹಿನ್ನೋಟ ಆ ಒಲವ ಬೀದಿಗಳಲ್ಲಿ ಅಂತಿಮ ವಿಧಾಯವೆಂಬಂತ್ತೆ.             ...